I le mae’a o tausaga e lua o galulue i ofisa o le Ekalesia Faapopotopotoga Kerisiano Samoa ina ua mae’a ona faau’u mai le Kolisi Faafaifeau i Malua, ma nisi ua maua nuu e galulue ai, e toa sefulutolu faafeagaiga o le EFKS ua maua o latou tusi Faifeau Samoa poo le FS, e mafai ai ona latou faatino nisi o sauniga tāua e pei o faaipoipoga ma le sakalameta o le faamanatuga.
O le Aso Toonai na tea nei i le faaiuina o le vaiaso muamua o le fono tele i Malua na faau’u ai faafeagaiga ma o latou faletua ise sauniga na faia i le Malumalu o le Iupeli.
O se sauniga sa faatumulia i aiga ma uo, aemaise o sui o aulotu ua galulue ai nisi o faifeau ua faau’u, aemaise foi o faafeagaiga ma usugafono ua faatasia uma nei i le laumua o le ekalesia mo le vaiaso mulimuli o le vaiaso autu lea o le fono tele o le a sasaa faaoti ai le utu a le faimea i finagalo o usugafono ma taitai o le ekalesia aoao e talanoaina mataupu mo le agai i luma o le ekalesia i ana atina’e ma le ola faaleagaga o ona tagata tapuai.
O Faafeagaia ma o latou faletua ua maua le FS, e aofia ai le susuga Esera ma Pauline Esera, le susuga Faasao ma Airona Ma’a, le susuga Koroseta ma Maria Tavita, le susuga Leefu ma Pule, le susuga Leuelu ma Panorama Setu, le susuga Luulau ma Faaiuga Taulagi, le susuga Martin ma Rosalote Taumate, le susuga Meafou ma Sapia’i Ah Ching, le susuga Sinapati ma Aomalu Sone, le susuga Tavita ma Naomi Pulu, le susuga Tiafau ma Lucy Vaega, ma le faifeau, le susuga Ulatifa ma le faletua ia Tuugatala Leulua’i.
