O se solitulafono e mamafa lona faasalaga, le faaleagaina o tupe pepa a Samoa ua faamaonia faaletulafono.
O le faamanatu lea a le faletupe tutotonu ua aumai i se faasalalauga faalaua’itele ona e iai le talitonuga, ua tele nisi o gaioiga ua molimauina ai le solia e nisi o lea aiaiga faaletulafono.
O ula tupe pepa e pei ona vaaia i sauniga e pei o faanofonofo i le faaeeina o ni suafa matai, o ula tupe ma ni pale fuiono ua tova i tupe pepa i ni fiafia masani a le atunuu o nisi ia o gaioiga ua faailoa e le faletupe tutotonu e solitulafono, auā e faaleagaina ai ia meatotino anagatā ma taugatā lo latou lolomiina.
O le fautuaga a le faletupe tutotonu o Samoa o se galuega fai faatasi a tagata uma le puipuia lelei o a tatou tupe pepa.
O se tasi na te faaleagaina tupe pepa e mafai ona faasala i le sefulu afe tālā, poo le nofosala i le falepuipui i le silia ma le 2 tausaga.
E mafai foi ona faasala tupe ma falepuipui ai se tasi pe a faamaonia lona faaleaga o a tatou tupe pepa.
