O le vaiaso nei ua amata taunuu mai ai se vaega o le oo atu i le toaselau avepasi mai fafo ua talia avanoa faigaluega.
O lea o loo matuai lagona e le toatele o tagata Niu Sila o loo faaaogaina auaunaga a pasi le faigata o le utiuti o malaga a pasi ona o le leai o ni avepasi.
O Ueligitone le aai o loo matuai mafatia, ma o le aai aupito i pisi foi lea i auaunaga a pasi.
O le masina lenei o loo tuuitiitia ai i le 20% malaga a pasi feoai i Aso Toonai i le tele o auala o le taulaga i Ueligitone faapea Porirua, ma ua toe faaopoopo ai i luga o le silia ma le 200 malaga a pasi o loo taofia mo se taimi le tumau.
Tuu mai foi ia Aukilani o le toatele e le o fiafia i le fiu e tatali ae uma ane e leai se pasi.
Ae mai le kamupani tele a le NZ Bus lea e ona le latalata i le 800 pasi o loo feoai i Aukilani, Ueligitone ma Bay of Plenty e tasi le selau avepasi ua talia avanoa faigaluega mai fafo ma o se fiafiaga tele lea.
O le vaiaso nei e amata taunuu mai ai nisi, o nisi o loo faatali o latou visa ma pe a o le tolu masina a sau o loo faamoemoe e omai ai.
O avepasi ua maua mai fafo o le a auina atu e galulue i Ueligitone lea o loo ave iai le faamuamua a le NZ Bus.
