O le toesea o se tinoitupe e tusa ma le 9 afe 225 tala ($9,225) o se meatotino a le pulega o malaevaalele le Samoa Airport Authority i le va o le aso 5 ma le aso 30 o Iulai o le tausaga e 2022, na faatino ai se suesuega faalotoifale a le pulega o malaevaalele.
O ia seleni na gaoia pe toesea, o tupe o lafoga a tagata malaga poo pasese e tuua Samoa mo Amerika Samoa.
O se tasi o le aufaigaluega e aoina ia lafoga na tuua’ia i le mae’a o lea sailiiliga faalotoifale ma ia ioeina ai.
O Tiresa Sanerivi Lotomatauama sa amata galue i le pulega o malae vaalele i le tausaga e 2021 ae faamuta lana tautua i totonu o lea auaunaga a le Malo i le tausaga na sosoo ai ina ua aafia seleni o lafoga o pasese a tagata malaga i Tutuila ma Manu’a.
Sa talosaga lana loia mo se faasalaga e lē nofosala i le falepuipui peitai o le silasila a le faamasinoga o se tasi lea o solitulafono ua faatupulaia ma o le iuga lava o le falepuipui.
Ua toesea mai le 10 masina ua nofosala ai Tiresa i aso sa nofo taofia ai i le vaaiga a leoleo a o faagasolo suesuega o le solitulafono.
