O se matati’a i taumafaiga a Samoa e lagolago polokalame e faaitiitia ai otaota lafoa’i poo le faalapisi ina ia puipuiamalu le siosiomaga aemaise o taumafaiga e faafetaui ai suiga tetele o le tau.

O se taumafaiga lenei ua maua ai e mafutaga a autalavou e sefulu le ta’i sefulu afe tala, e faafoe ai a latou polokalame e a’oa’o ai tupulaga talavou i le taofi o le faalapisi, a’oa’oga mo le toe faaliliuina o otaota poo le recycling, faapea le una’ia o le totōina o laau tau faato’aga e faaaogā iai otaota faalenatura e ola lelei ai poo organic farming.

O le Aso Tofi o lenei vaiaso na faamautū ai lea fuafuaga i se maliega ua sainia e le Iuni a Europa ma faalapotopotoga tuma’oti e tolu ua galulue faatasi mo lea taumafaiga e aofia ai le asosi o auaunaga tau i le pulea ma le faaliliuina o otaota lafoa’i le Samoa Recycling and Waster Management Association, o le Samoa Faasao Society ma le faalapotopotoga o le Samoa Women Association of Growers.

O le Matagaluega o Puna’oa Faalenatura ma Siosiomaga o loo lagolagoina lea taumafaiga, e pei ona saunoa le Minisita o le matagaluega i le sainia o le maliega e faatino ai lea polokalame.

Le Minisita o le Matagaluega o Puna’oa Faalenatura ma Siosiomaga, afioga Toeolesulusulu Cedric Schuster. 

E selau afe tālā le fesoasoani a le Iuni a Europa ua amata ai lea polokalame e pei ona tauaao ai e autalavou e sefulu le ta’i sefulu afe tala.