Ua faailoa e sui o le komiti o tapenaga o le tutoatasi i le masina fou faapea polokalame e taualuga ai le 60 tausaga o le tutoatasi, le ave o le valaau faaaloalo a le Malo o Samoa, i Palemia o Malo o Fiti, Tonga, ma le Atu Kuki e auai i le faamanatuina o le 61 tausaga o le tatou tutoatasi.
E lei faamautuina i le taimi nei le auai mai o ia taitai o Malo peitai ua faailoa e le tofa Agafili Tomaimano Shem Leo, e tatau ona faamautu lea tulaga i le faaiuga o le vaiaso nei.
O isi Malo faaaloalogia masani o loo ave foi iai le valaau faaaloalo, o le Kovana o le faigamalo a Amerika Samoa, ma le Ulu o Tokelau.
Ua mautu polokalame o le taualuga o le 60 tausaga o le tutoatasi lea o le a faatino i le Aso Lulu o le vaiaso fou, ma o le afiafi i le 4 faia ai lea sauniga i le malae i Tiafau, lea o le a tauaao ai ma faailoga taualoa.
E toa 15 i latou ua faamautu e le Kdapeneta le tuuina iai o ia faailoga ma ua faailoa e le sui o le komiti o faailoga taualoa le tofa Agafili, o le toatele o i latou ua filifilia o tamā ma tina matutua o le atunuu ua iloga a latou auaunaga ma tautua.
O nisi ua aulia le 80 ma le 90 tausaga o le soifua.
O le taimi nei ua ave le tuualalo a le komiti o tapenaga i faalapotopotoga ma aoga e fia auai i le savali faaaloalo masani o le tutoatasi i le aso muamua o Iuni, ina ia lesitala e faamautu ai lo latou auai e patipatia le aulia o le 61 tausaga o le tatou Malo Tutoatasi.
