O se suesuega sa faia i le atunuu atoa e faatatau i le Long Covid poo le faaumiumi o auga pe a mae’a ona aafia i le Koviti-19 ua iloa ai e tasi mai le lima o tagata na faia iai suesuega e aafia i lea tulaga.
O le suesuega sa faauluulu i le fomai o Dr Lynne Russell ma Dr Mona Jeffreys mai le Iunivesite o Victoria ma o le suesuega sa faia i le tusa ma le 990 o tagata na aafia i le koviti a o lei oo i le aso 1 o Tesema o le 2021.
Lipotia e i latou ia o auga o le long covid e aofia ai le lēlavā, lē au le mānava, tiga maso ma sooga o le tino.
Fai mai le ausuesue pe ā ma le 300 afe tagata Niu Sila e ono aafia i le long covid ae aupito tele le lamatiaga i tagata e iai aafiaga o le fatu ma matele ina tetele tino.
Ua maua foi i lea suesuega o le toatele o tagata e aafia i auga o le long covid e le o lava le malamalama i le tulaga lea e pei ona faaailoa e fomai ma ua faamatala ai foi e manatu i latou ia e le o lava le tausiga tau le soifua maloloina o loo tuuina mo i latou.
O le iuga o le suesuega ua ta’ua ai o aafiaga o le long covid e ogaoga i tagata Maoli, Pasefika ma tagata e iai manaoga tumau.
O le aliae mai o le iuga o lea suesuega ua valaau ai tagata mo se suiga i le faaaogaina o livi ma’i.
