O le ‘au a le Manu Samoa i le tausaga e 1991 na filifilia iai le susuga Tuiloma Ollie Crichton ma o se suafa sa logologoā ma lauiloa foi i le taaloga lakapi i totonu o le afioaga o Apia.
O se tamalii e tele ana taleni auā e lē gata i le taaloga lakapi ae faapea foi le faagatama i le tai i tuuga fautasi e pei ona sa ia kapeteniina le fautasi o le Kionasina mai Apia ma le Aviivii mai Toamua i ni tausaga ua mavae.
O le Aso Tofi o lenei vaiaso o le a faia ai ona toe sauniga ina ua valaau iai lona Matai i le aso 12 o le masina nei ona o gasegase sa feagai ma ia.
Ua faailoa i se faasalalauga o lona maliu i luga o upega tafailagi, o le fanuatanu i Tufuiopa i Apia o le a lagomau ai, pe a mae’a lona sauniga lotu i le ekalesia a Iesu Keriso o le Au Paia o Aso e Gata ai i Pesega.
O le a manatua pea lea tamalii i lona sao i le atina’e o le taaloga lakapi i Samoa.
