O le aiga mafatia o si tina lea o loo lipotia na uma lona ola i le masina na tea nei, ua o latou valaau nei mo le faia o se suesuega faalauaitele i le mafuaaga o le maliu o lea tamaitai.
O Jamikka Binge-Olive ua feta’ua’ina i le lipoti a le 9News na faaoolima iai se tasi i se kalapu i le Northen Rivers ma maliu ai lava i le masina na tea nei ina ua lē taliaina lelei i le falemai ina ua agai atu mo se togafitiga.
Ta’ua e le lipoti o le tina lea e 28 tausaga ma e toalua si ana fanau ae fai mai e 58 minute sa faatali ai mo le taavale a le falemai.
O le faalavelave e faapea sa ia taumafai ai e tetee atu i se tagata na osofaia o ia i le Casino Club i le aso 23 o Iuni.
Fai mai na iu ina toe ave e le taavale a lona tuagane i le falemai ma fai ai na o le fusiga i lona mata ma le fualaau paracetamol.
O le finau a le aiga e lē malamalama pe aisea na lē taofia ai i le falemai.
E fā vaiaso mulimuli ane na aafia ai i se faaletonu a o iai i fafo o se faleoloa o Coles i le masina talu ai ma maliu ai lava.
Ua tuuina atu nei le mataupu i le coroner mo suesuega.
