O loo taumafai malosi pea nai faalapotopotoga e fesoasoani i tagata poo charities ina ia mafai pea ona tali atu i le tele o le mau mana’oga mo taumafa i le vaitau o aso fiafia aemaise le iai o se suiga i foa’i e tuuina ane e tagata i se taimi o le taugatā o le soifuaga.
O se tasi o tagata faigaluega i nei charities sa ia faamatala i le 9News ua silia ma le 16 tausaga o fesoasoani i le fafagaina o tagata i le Wayside Chapel i Kings Cross ae na te le’i vaaia se taimi ua aupito to’atele ai tagata e mana’omia taumafa e pei ona iai i le taimi nei.
Fai mai a ia e foliga e lē alu ese lenei faafitauli ae faaauau pea ona faateteleina, ma e faaopoopo ai foi ma lu’itau mo i latou e faatinoina ia auaunaga.
Ua lipotia i le 9News le faamatalaga mai ia i latou e faaauau pea ona faia lea auaunaga i tausaga ta’itasi ua faailoa ai e nisi ua tauau ina lē mafai ona faaauau lea tautua ona ua iai foi nisi donors poo i latou sa foa’i atu taumafa i tausaga uma ae ua feagai foi latou ia ma lu’itau ona o le tau o le soifuaga.
E faalagolago le tele o nei taumafaiga i auaunaga e pei o le Foodbank Australia ma isi, e fua i lipoti mai ia faalapotopotoga mo le tausaga lenei 2024, ua ta’ua ai pe ā ma le 3.4 miliona aiga e feagai ma lu’itau ia o le lē lava o taumafa i totonu o le 12 masina ua tuana’i atu.
Puna o Faamatalaga: https://www.9news.com.au/national/bottomless-pit-demand-for-food-banks-increase/adf83155-108a-40b7-8c73-ceed77e2ed25
