O le po anapo lea na matuai iloga ona lagona ai le saua o Hale aemaise lava i le North Island.
O Gisborne na sau ai anapo le tala ua tatau ona o ese aiga o loo nonofo latalata i le Hikuwai River ona ua le saogalemu, ma e faapea e 15 aiga o loo nonofo latalata ane ai na aveesea faamalosi mai anapo.
I Coromandel e tele auala ua momotu e le malosi o lologa ma o lea na sau lapataiga i tagata feoai e aua le feoai i luga o auala.
O loo faaauau pea ona motusia le eletise mo le tele o aiga i Coromandel.
I Whitianga o le taeao nei o loo taumafai ai e tala auaua’i le fale a le kalapu a le Mercury Bay Boating ona ua momotu ese e le malolosi o galu le tele o le palapala ma ua oo ane lava i le nofoaga o loo tu ai.
I Whangarei, o le taeao nei o loo faaauau ai galuega toe faamama ma o lea na taofia faigamalaga a vaalele ananafi i Whangarei ona ua le saogalemu.
Mai le ofisa o le vaaitau o le po ananei e tatau ona oo atu iai ua māmā timuga mamafa ma faasolo ina lagilelei, peitai o loo tulimataia pea e le ofisa le ono toe agai mai o le isi afā i le vaiaso fou.
