O le uumi o itula faigaluega o loo tuuaia i le maliu o se tagata kuka poo le chef lea na lavea lana taavale i Hastings ma maliu ai.
O le faamatalaga lea mai le coroner e faapea o Perumal Dinakaran, 23 tausaga na maliu ina ua feto’ai lana taavale ma se loli a o agai atu e faigaluega.
O ia o se kuka i se kalapu i Napier ma e matele ina mānava mai lana galuega i le va o le 9-10 i le po o le tele o aso.
I le tolu vaiaso a o lei tupu le faalavelave na amata ai lē ua maliu i le isi ana galuega o le faatutumuina o fata o faleoloa i falaoa i supamaketi ma e amata i le 5 i le vaveao.
Ua faailoa i le lipoti a le Newshub o le 2018 na tupu ai le faalavelave ina ua agai atu lē ua maliu mo lana galuega i le supamaketi ae lavea ai lana taavale ina ua se ese mai le laina ogatotonu o le auala ma feto’ai ai ma se loli e sau mai le isi ituala, na maliu ai lava Dinakaran i lea nofoaga.
O le mae’a o le suesuega a le coroner lea ua tuuina mai ai loa ma le faaiuga lea i le uumi tele o itula faigaluega ma e foliga sa moe lē ua maliu pe masalomia foi se tulaga faaletonu i le soifua maloloina.
Faamaonia e le coroner o le lē lavā o le avetaavale na mafua ai ona tupu lea tulaga.
Na tuuina ai e le coroner ma nisi o mea e ao ona silasila iai le malo ma fale faigalluega ina ia faaleleia atoa ai ma le silafia lelei o mea e tutupu pe a lē lava le malolo a soo se tagata.
