O le ‘ava faatupu na faatino e le afioaga o Vaimoso o le polokalame lea na tomua ai tapenaga a le Puleaga a Samoa Apia o le Ekalesia Katoliko e faafeiloai ai au malaga mai atunuu eseese o le lalolagi, o loo auai i le fono lona lima faavaomalo a le ekalesia ua ta’ua o le WACO, poo le World Apostolic Congress on Mercy, ua talimalo ai Samoa mo le taimi muamua.

O se fono tele sa taulamua ai le taitai o le Puleaga a Samoa Apia ua tuumalo le afioga Akiepikopō Alapati Lui Mataeliga, i le aumaia i lo tatou atunuu e faatino ai.

I le ‘ava faatupu na taute ai le sui o le afioga i le Tama Paia Pope Franisisi o loo auai i le fonotaga e fai ma ona sui, faapea taitai maualuluga o le ekalesia o loo auai, faapea le afioga i le Sui Palemia ma nisi o minisita o le Kapeneta aemaise o ositaulaga ma akiepikopō mai isi vaega o le Pasefika ma le lalolagi ua mafai ona malaga mai i le faamoemoe.

Se vaega o le saunoaga mai le afioga i le Sui Palemia, afioga Tuala Tevaga Iosefo Ponifasio i le polokalame amata o le koneferenisi o le WACOM.

O se tasi o sui o le komiti o tapenaga le afioga Patele Spa Silva na fesiligia e tusa ai o le faamoemoe ma le autu o le faatasiga ua talimalo ai le Puleaga a Samoa Apia o le Ekalesia Katoliko i lo tatou atunuu.

Le afioga Patele Spa Silva i se faatalanoaga e tusa ai ma le faamoemoe o le Ekalesia Katoliko.

O loo talaapi uma le toatele o aumalaga i le nofoaga o le Tofa Mamao i Leauvaa, a o nisi aumalaga o loo api i nisi o matagaluega faapea ma nisi o loo faamautu i faletalimalo.

O le vaiaso atoa lenei ua faagasolo ai le koneferenisi o le WACO, ina ua mae’a le sauniga o le Misasa Paia na tatala aloaia ai.

O le malumalu o le ekalesia katoliko i Mulivai i Apia na faatino ai lea sauniga i le afiafi o le Aso Sa ua mavae atu nei, ma sa faatumulia e leai se ofi ma sa auai foi taitai o le Malo ma le toatele o usugafono mai atunuu o le lalolagi.

O atunuu o le Pasefika, atunuu mai Asia, o Europa, ma Sasae Tutotonu o loo auai.

O le autu ma le ta’iala o le faatasiga lona lima lenei a le Divine Mercy o le Agaalofa mamana, “O le Moana o le Alofa ua ufitia uma ai le lalolagi”.