O le toe usuia ai o le Fono Faatonu o le atina’e o tagata tafafao mo atunuu o le Pasefika i Saute le South Pacific Tourism Board of Directors, e aofia ai ma Samoa, ua faatalanoa ai auala e toe faaleleia ai lea atina’e tāua o se tasi o lagolago malosi i le tamaoaiga o atunuu taitasi.
O le tāua o le toe fono ai o Faatonu ona ua tuanai le lua tausaga o tu faaletonu le atina’e o turisi e mafua i le faamai Koviti-19.
O le Minisita o Tagata Tafafao le afioga Toeolesulusulu Cedric Schuster ma le tamaitai Ofisa Sili o pulega o tagata tafafao a Samoa o loo auai i lea fono tāua, ma le faamoemoe maualuga o le a maua ai ni faalumaga lololo e toe tapue ai faaletonu o le atinae i Samoa.
O le fuafuaga alualu mamao o lenei atina’e mo atunuu o le Pasefika i Saute o loo taulai ai le silasila e tatau ona oo atu i le tausaga e 2030 ua ausia nisi o manulauti o le fuafuaga, ina ia saga faaleleia ma siitia ai i se tulaga e manuia ai tamaoaiga o atunuu taitasi.
O le Atu Kuki o loo usuia ai lea fonotaga na amata i le faaiuga o Oketopa ae maea i le faaiuga o le vaiaso nei.
