O le fonotaga 66 lea a le Faalapotopotoga o Malo o le Taupulega lea o loo usuia i Ghana Aferika ma o loo auai ai Samoa i le silia ma le 600 o sui usufono lea o loo faagasolo i le vaiaso nei.
I pepa o faamatalaga mai le Ofisa o le Fono, o le Fofoga Fetalai, Afioga Papalii Li’o Oloipola Ta’eu Masepa’u o loo taitaiina lenei aumalaga e aofia ai ma le Minisita Lagolago o le Matagaluega o Faamasinoga ma Pulega Tau Faamasinoga, Afioga Fesolai Apulu Tusiupu Tuigamala ma le Sui Tamaitai mo le Itumalo o Alataua Sisifo Afioga Aliimalemanu Moti Momoemausu Alofa Tuuau faapea ai ma le Sui Failautusi o le Fono, Lesa Yonita Tuia-Tauiliili.
O le sini autu o lenei fonotaga o le silasila lea i nisi o mataupu faavae auā le agai i luma o auaunaga faa-Palemene ma faamautu ai mataupu e aofia ai Aafiaga o le Fesuiaiga o le Faitau Aofai o Tagatanuu i Puleaga Laiti, o Palemene Laiti ma le Faasoaina o Puna’oa, faapea le Fausiaina o Palemene Tutoatasi: Faiga Mautinoa o Tulaga Tau Tupe ma Pulega Tutoatasi.
O le faafoeina o lenei fonotaga o le a faatino ai nisi o faatalatalanoaga o mataupu auā le agai luma o auaunaga o Palemene o Malo o le Taupulega.
O le a avea foi ma Sui o Samoa le Afioga Aliimalemanu Moti Momoemausu Alofa Tuuau i totonu o le Fonotaga a Sui Usufono Tamaitai a Palemene o Malo o le Taupulega.
Na amatalia le fonotaga i le aso 1 o Oketopa 2023 ma o le a faamae’aina i le aso 6.
