O loo faagasolo i le vaiaso nei le fonotaga a Palemene mo Malo o le Taupulega mo Ausetalia ma atunuu o le Pasefika lea o loo auai ai nisi o sui o le Palemene o Samoa.

I faamatalaga faasalalau faalauaitele i upega tafailagi e le Ofisa o le Fono, o le Sui Fofoga Fetalai o le maota, Auapaau Mulipola Aloitafua Mulipola, Sui Taitai o le Itu Agai Lauofo Fonotoe Pierre Lauofo ma Vaafusuaga Toomata Iole Sanerivi o le Faauluuluva o le Vaega Faaliliu Upu i le Ofisa o le Failautusi, o i latou ia o loo fai ma sui o le Malo e auai.

E silia ma le onosefulu sui auai o lenei fonotaga ma o loo autu i tupulaga talavou ma le Palemene ia avea ma sui mo le lumanai.

Na filifilia le Afioga i le Sui Fofoga Fetalai, Tofa Auuapaau M. A. Mulipola e avea ma Sui Taitaifono mo lenei fonotaga e pei ona sa faatuina ai e le Fofoga Fetalai mo le Palemene o le Atu Kuki ma faamaonia e sui auai.

O mataupu sa auga iai folasaga a sui mai Samoa e aofia ai le avea ma sui ma le tāua o le auai na tapenaina e Auapaau faapea ai ma se tasi o folasaga na saunia e Lauofo e faatatau lea i aafiaga o aoaoga faa-Palemene mo le auai ai o tupulaga talavou i upufai o Malo.

O le a taualuga taualumaga o lenei Fonotaga i le tuuina atu aloaia o le matafaioi i le Palemene o Samoa, e talimalo ai i lenei fonotaga mo Itulagi o Ausetalia ma le Pasefika, ia Oketopa o le tausaga fou 2024.