O le ono ai nei o tausaga o faia pea le polokalame lenei e le Matagaluega o Aoga Taaloga ma Aganuu i aoga i le atunuu ina ia unaia le faitautusi, tusitusi o mataupu o le Matematika ma le faasaienisi lea e molimauina e le Matagaluega le tulaga faaletonu o iai.
O loo faafoeina nei i le motu tele i Salafai i aoga e pei ona faatino ai i Aoga Tulagalua ma Kolisi i itumalo a Itu o Tane 1 ma le 2 poo le Sone 7 lea na muai amatalia i le aso ananafi.
E pei ona saunoa le Sui Ofisa Sili Lagolago Tuaopepe Perenise Tinei o se auala lenei a le Matagaluega e foia ai lenei faafitauli o loo feagai ma fanau aoga.
“Ua 6 ai nei o tausaga talu ona faavaeina lenei famaomoe tāua a le Matagaluega o Aoga ona o se fofo lea ua manatu le matagaluega e faaauau pea ona o le tulaga i le faaletonu o le faaiuga o aoaoga a le fanau i le faitautusi, tusitusi, Matematika ma le faasaienisi.
“O le upu moni, e leai se teine ma se tama aoga e vaivai, e talitonu foi le mataglauega e tofu le tama ma le teine aoga ma le agavaa ma taleni e mafai ona faaaogā i lo latou soifua a’oa’oina.
“Ae peitai e iai le lagona palaai e faaaogā, e palaai i meaane ua toē mai isi tamaiti, pe aamu iai se tamaitiiti poo se faiaoga poo mātua foi auā e tupu lava.
“Peitai o le polokalame lenei e aogā tele e tatala mai ai agavaa ma taleni a le fanau e lagi faapese le saienisi, faatino pei o se ata tifaga le faitautusi ma le tusitusi ae faasolo le matematika.”
O le manulauti o le faamoemoe o lenei tausaga ia Saogalemu nai lo le salamō e o tutusa lea ma le tulaga o loo iai lenei vaitau i le lolofi mai o suiga ma luitau ae le o mafai ona gata ai le fesoasoani a le Matagaluega ina ia mautinoa le lumanai o tupulaga lalovaoa ia manuia.
O le faamalo a le Matagaluega i mātua sa taputapuaia ma fesoasoani i taumafaiga a le fanau e talitonu e le o se tiute faigofie.
“O le upu moni e lē mafai e le Matagaluega ona faatino se atoatoa silisili ona lelei i le a’oa’oina o alo ma fanau a le atunuu matou te faamoemoe atu iinā o le tatou galuega e tauave faatasi ina ia aotauina i se tulaga sili atu ona lelei a tatou fanau.”
Ua mafai ona faatautaia lenei faamoemoe ona o le fesoasoani a nisi o kamupani e aofia ai le Samoa Stationaries and Books (S.S.A.B) Marfleet Printing Limited, Lynns Supermarket ma le Faletupe Tutotonu a Samoa.
