Fai mai le Education Review Office poo le ERO e ao i aoga ona faatino nisi faiga e taofia ai faiga faailogalanu i tamaiti mai komiuniti e tutusa aganuu ma talitonuga, ethnic communities.

O se lipoti ua lomia e le ofisa lea i le vaiaso nei ua ta’ua ai e tasi mai le lima o tamaiti mai komiuniti ia o loo faia iai ni uiga faailogalanu i le masina na tea nei i totonu o aoga ma le toeititi tasi vae tolu o i latou ia ua o latou faailoa e le o silasila totoa a latou aoga i le faaletonu lenei.

Fai mai e silia i le ‘afa o i latou ia ua lipotia mai ua o latou molimauina tagata e faailoa uiga le manuia i isi tagata ona e mafua mai i tupuaga ma talaaga ae iai foi tamaiti ua faailoa e nanā o latou tupuaga i nisi taimi ona o ituaiga uiga ia ma afai foi e faailoa popolega e le o iai ni gaioiga o faia iai. 

O le lipoti o loo aofia ai ma faamatalaga mai tamaiti aoga ua ta’ua ai e toatele faiaoga ma le aufaigaluega i aoga e faailogalanu ma e le popole foi pe a faailoa atu iai ni tulaga faapea pe afai e ese lau gagana poo tupuaga foi.

O le lipoti na tuufaatasia mai le iuga o se suesuega na faia i aiga e 1,250 e aofia ai tamaiti aoga e 558 ma faiaoga e 263.