Ua unaia e le Palemia o Samoa, afioga Fiame Naomi Mataafa taitai o le Pasefika ina ia savalia tulaga ua tautalagia pe a faia faaiuga fai faatasi.
O le saunoaga lea a le tamaitai Palemia sa faia i le sauniga na faafeiloai aloaia ai le failautusi o le Pacific Islands Forum Henry Puna lea o loo i Samoa i lenei vaiaso.
Lipotia e le Leitio faavaomalo a Niu Sila ua saunoa le tamaitai Palemia i le malosi o le talitonuga o Samoa i le Blue Pacific lea o loo avea ai Samoa ma sui, ma o se fuafuaga e le o aofia ai ni faiga faatauvaga faamiliteli ma aofia ai ma se Pasefika e saoloto mai ni vevesi ma ta’ua e pei ona aafia ai isi vaega o le kelope.
Ta’ua foi e le tamaitai Palemia i lana saunoaga e tumau pea le naunautaiga o Samoa ia faatino sootaga ma ana paaga i se tulaga tonu ma talafeagai ma ia tumau pea foi o se lagolago malosi i le Forum.
