O le ta’ita’i o le malo i le tamaitai Palemia, o le saunoaga aami lea na tatala ai galuega tetele e lua ua mae’a a le afio’aga o Tufulele i le itumalo faapalota o Sagaga 4.

O ia galuega o le toe faaleleia o le vaitā’ele lea e iai ona talatuu, ma le maota fou ua fausia e lata i le vaitā’ele o le a tapuvae tasi iai fuafuaga o atina’e mo tina ma tamaitai o le nuu faapea ona tupulaga talavou.

E 898 afe le tau o ia galuega e lua ma sa faatupe i se vaega o le poloketi tasi le miliona a le itumalo o Sagaga 4, ae o se vaega tele na faatupe i foa’i ma fesoasoani a paaga a le afio’aga o Tufulele. 

O le vaitā’ele o le nuu e iai ona talatuu ma o le isi lea o mataaga o le a tatala i tagata tafafao ma lo tatou atunuu.

E ui foi o loo iai le tala i le ulugalii Taga o Tufu ma Lele e faasino i le vaitaele o lea afio’aga ae na faaalia e se matai le tofa Agafili Tomaimano Shem Leo, o lea tala ua o se fagogo, ae o loo iai lava talatuu faasino i le vai taele.

Le tofa Agafili Tomaimano Shem Leo o se matai o Tufulele.

O le tasi lea o afio’aga ua latou faaaogā le ta’iala a le malo o fuafuaga alualu mamao o le atina’e manuia o nuu ma afio’aga o Samoa e tapena iai isi a latou galuega tetele e faaaogā iai le poloketi tasi le miliona tālā.

E 178 afe le vaegatupe na faamatuu mai i lea poloketi a le Malo sa fesoasoani ai i le faatupeina o galuega e lua ua mae’a nei lea na umusa i le Aso Tofi o lenei vaiaso.

O le atunuu o Cameroon o loo avea ma malo faaaloalogia a Tufulele e pei ona autū iai le teuteuina o le afio’aga, a o tu lalata atu ai i le Fono a Malo o le Taupulega.