O Aperila o le tausaga nei na tula’i mai ai se solitulafono na faao’o ai e se tamā ua 34 tausaga o le matua ni manu’a i se isi tamā na ia fa’aaoga ai se a’upega matautia o se agaese la’itiiti. Na faamanu’alia ai le fatafata o lē na a’afia, ae fa’aleagaina lana ta’avale na tae’i le tioata o luma ma tua ina ua tau’ai i ni ma’a, ma molia ai e leoleo Aisealeoo Nofo Tufuga Tovia o Toamua ma Matavai i Savai’i.

O le mafua’aga e pei ona fa’ailoa i fa’amaumauga a leoleo, ua to’atāma’i lē ua molia i se so’otaga fa’alilolilo a lona to’alua ma lē na a’afia i lana gaioiga solitulafono. O le 5 o le vaveao o le Aso Gafua 13 o Aperila o le tausaga nei a’o faasuā’avā lē ua molia sa nofonofo ai ma fa’atali le taunu’u atu o lona to’alua, lea na alu atu i le vaveao lea i le ta’avale a lē na ia faao’o iai manu’a ma tau’ai lana ta’avale i ma’a.

Na faufau’e’ē le tamā na faia iai le gaioiga ma aga’i ane ai se tasi o le aiga o le tinā ma fa’atino le lavea’i. Na logo leoleo ae ave i le falema’i lē na faamanu’alia ma fa’agasolo ai loa su’esu’ega a leoleo.

O le ioeina e lē ua molia o moliaga o le umia o se a’uupega mata’utia, faao’o manu’a tūgā, ma le fa’aleaga o meatōtino ua nofosala ai i le falepuipui mo le 20 masina poo le tasi le tausaga ma masina e valu.

O le tamā na a’afia ua 44 tausaga o le matua o lona soifua.