O le lē lava o tupe o loo faatupe ai emergency departments (Eds) lea ua mafua ai ona umi taimi e faatali ai se gasegase e vaai se fomai.

O lea ua faaulu le faasea aloaia a se tasi o le aufaigaluega i le falemai i North Shore agai i le pulega a le Te Whatu Ora ma o loo ta’ua ai ua moomia vave se fesoasoani mo gasegase e iai aafiaga tau i le mafaufau lea e faitau aso e faatalitali ai mo se avanoa.

Mai le minisita o le soifua maloloina Andrew Little ananafi o lea o loo ia silafia o potu taofia nei e nonofo ai tagata o loo moomia le fesoasoani i le mafaufau ua matuai faatumulia lava.

Ta’ua ai foi e le minisita o le lē lava o moega le isi mafuaaga.

Ae mai le pulega a le matagaluega o le soifua maloloina, o lea ua mae’a ona logo le minisita e tusa ma le iai o se tausi soifua i le ED a le falemai a North Shore i taimi uma.

Ua toe tautino ai foi le minisita e lei manuia lava taumafaiga na fai e foia ai faafitauli i auaunaga a le soifua maloloina, peitai o loo mafanafana o lea ua faasolo suiga.

E ui la i le umi ona faatali i ED, ae o loo faamalosia pea e le minisita tagata o loo moomia vave le vaai o se fomai e aua nei avea lea ma mafuaaga o le a le alu ai e vaai le fomai pe a moomia vave.

Ae mai le National, ua tatau i le malo ona faia suiga i visa o fomai mai fafo ona ua moomia vave se fesoasoani i le tulaga o loo iai nei.