Ua tuuaia le vaega faaupufai a le Leipa i le faaseseina o tagata sa o latou folafola o le a fesoasoani iai i se paketi o le tau o le soifuaga sa faatalitalia mai le tala faatatau o le tupe poo le Budget sa folasia i lenei vaiaso. 

O le 9News ua o latou lipotia finagalo faaalia o nisi i le $14.6 piliona e pei ona folasia e le teutupe o Jim Chalmers i le tala o le tupe ma o manatu e matele ina faailoa ai le lē fiafia i le tulaga na faailoa.

O le peimeni mo le au lē faigaluega o le a siitia i le 40 tala i le lua vaiaso e amata mai ia Setema mo i latou e tai 55 tausaga ma sili atu ae o le fesoasoani mo le tagata saili galuega, jobseeker e matuai maualalo atu nai lo le aofai na fautuaina e le panel a le malo sa iloiloina le tulaga lea ma e manatu le toatele e lē taitai ona lava.

Ua faaupu e le taitai o le Green o Adam Bandt le peimeni lea o se taufaasese i tagata sa folafola iai o le a lē misia i latou i lea paketi.

Fai mai a ia o le taimi nei e faitau miliona tagata o loo soifua i tulaga matitiva, uumi laina i nofoaga e maua fua ai meaai ma le toatele ua faamalosia le leai o ni mea e nonofo ai ona o le lē gafatia o rents ma le toatele ua filifili i le totogi o le rent pe faatau ai meaai i tupe maua.

O isi finagalo faaalia i isi vaega o le Tala Faatatau o le Tupe o loo faailoa le fiafia ona o faamāmā avega e pei ona folasia atu ia latou auaunaga.