Ua valaaulia mai e le peresetene o Amerika, Joe Biden le Palemia o Niu Sila, Chris Hipkins i le fonotaga a le Pasefika lea e faia i Papua Niu Kini.
O le vaiaso fou lea ua faamaonia mai e le ofisa o Chris Hipkins o le a malaga ai i Papua e feiloai ma isi taitai Pasefika faapea ai le Peresetene o Amerika, a o malaga mamao mai ai Biden ma saunoa ma saga toe faamalosia faiga faapaaga i le va o Amerika ma atunuu o le Pasefika.
E le o toe po se lilo o le Pasefika lea e pei o loo taulai mai iai Saina ma Amerika.
A tuu mai ia Niu Sila, e fai lava si faafaigata ona o lea e tele ina faalagolago Niu Sila ia Saina i fefaatauaiga, a o Amerika o se paaga.
A o lei afea ai la e Biden le Pasefika mo lea fonotaga, o le a muamua ui ane i Iapani mo le fonotaga a le G7 Leaders faapea ai le Quad Leaders Summit i Ausetalia.
O le tausaga nei ua malaga mai ai Biden i le Pasefika, a o le tausaga talu ai lea na talimalo ai le fale paepae mo le uluai fono a le Pasefika ma Amerika.
