Ua lē ausia e le malo le taimi faatapulaa na tuu atu ai e tatau ona faailoa mai ai poo le ā se isi fuafuaga e faaaogā e suitulaga ai i le Harbour Bridge i Aukilani.
O le auala laupapa lenei i Aukilani na tele ina tapunia ananafi ona o le malolosi tele o savili, ma a oo foi ina lavevea ai taavale e tapunia uma ai lava ma aafia ai ma feoaiga a tagata e kolosia.
E lima itu na vaavaai iai i le masina o Mati e mafai ona faaaogā e fili mai ai se tasi e mafai ona suitulaga i le auala laupapa, ma o lea sa tatau ona maua le faaiuga a le malo i le masina talu ai, peitai o lea ua uma e leai.
Fai mai le Palemia Chris Hipkins ananafi, atonu o le vaiaso a sau e logo mai ai.
Na tuua’ia ai e le Palemia o le suiga o minisita e pei ona suia mai ai ia Michael Wood agai i le minisita fou ua iai nei o le isi lea itu.
Mai le National, o se faatuai e lē o faate’ia ai i latou.
