Ua iu lava ina uma le ola o le pepe teine o Ivy lea sa tau togafitia i le falemai o tamaiti i Westmead talu ona mae’a le faalavelave na lavevea ai le latou taavale ma si ona tina ma lona tuagane e lua tausaga lea na maliliu ai i le amataga o le vaiaso. 

Fai mai leoleo o Ivy e na o le tolu masina, na uma lona ola i le asō ma o si ona tina o Katrina Sila 34 tausaga ma lona tuagane o Kai e 2 tausaga ua maliliu foi.

O se tala faanoanoa i si nei aiga ma ua faailoa i lipoti a le 7News e talitonuina o le tamā o le aiga sa faigaluega i le taimi na tupu ai le faalavelave.

Na faaoo faamaisega a le toatele i si aiga o Ivy ae na o latou faailoa foi i se pepa o faamatalaga lo latou agaga faafetai i tagata uma na fesoasoani ane aemaise le aufaigaluega a le falemai sa tau togafitia ai si pepe o Ivy.

O loo faia pea suesuega i le mafuaaga o le faalavelave.