E ui e le o se fonotaga faigofie, peitai o lea ua sau i tua i tagata lautele le faatalanoaina o le paketi faataoto a le pulenuu o Aukilani Wayne Brown.

E le o sui uma na iai ananafi i lea faatalanoaga na fiafia i le paketi a le pulenuu, lea e fefiloi ai le sii o rates faapea le faaitiitia o tupe faaalu e tusa lea ma le $130 miliona.

O le molimau a Josephine Bartley o Maungakiekie, o se paketi ua mātele i le itu tau tupe ma o loo faatatau lea saunoaga i fesoasoani tautupe o loo faaalu i polokalame mo le komiuniti poo community grants lea o loo fuafua o le a faaitiitia.

O le fofola mai ai o le paketi faataoto a le pulenuu ananafi na sau ai foi ma tala, o loo vaavaai e faatau le 18% o sea a le council o loo iai i le malaevaalele a Aukilani ma o se tasi o mataupu na umi ai foi se taimi o felafolafoa’i ai manatu.

E ui o se fonotaga e lei faigofie ae o lea ua oo i le isi laasaga lea o le aumai i tua i tagata lautele mo le faatalanoaina lea e amata faia ia Mati o le tausaga fou a o lei sainia ma faamautu ia Iuni.