Ua faaopoopo atu le lagolago a le itumalo o Aiga i le Tai, i le polokalame o le tetee atu i sauāga faasaga i tinā, o tama’ita’i ma fanau, e pei ona sainia e le faipule o lea itumalo le tofa Auapaau Mulipola Aloitafua Mulipola ma sui o lea itumalo le maliega e auai i le polokalame mo le umi e fā tausaga.
O loo fesoasoani le faalapotopotoga o le UN Women Funds i le faatupeina o polokalame uma e pei ona aofia ai ma nisi o itumalo faapalota o le atunuu ua mae’a ona latou sainia lea maliega poo se Memorandum of Understanding.
I se pepa faalauiloa mai le faalapotopotoga o le Toomaga mo ē Puapuagatia o loo faatinoina le polokalame o le tetee atu i sauāga, ua faailoa ai o le auai o le itumalo o Aiga i le Tai, o le a faatino ai a latou polokalame uma i se taumafaiga e puipuiamalu tinā ma tama’ita’i ma fanau a le itumalo mai le toe aafia ini sauāga, o le tino ma le mafaufau.
