I le faagasolo ai o fuafuaga ma galuega a le Matagaluega o Tina ma Tamaitai, Atinae o Afioaga ma Agafesootai, o le aso ananafi na faatautaia ai le uluai fonotaga a le Tamaitai Minisita, le afioga Hon. Mulipola Anarosa Ale-Molioo ma Sui o Nuu, Sui Tamaitai ma Sui o le Malo mo Upolu.  

O lenei fonotaga na faaleo ai e le Minisita lona agaga faafetai e tusa ai ma galuega lelei sa fitaituga ai sui uma i le tausaga ua mavae, ae faapea galuega faaauau mo lenei tausaga 2024.  

O lea foi fonotaga sa folasia ai le lipoti o galuega na galulue ai nuu ma afioaga i le tausaga 2023.  

I lea lipoti na faamauina ai le tele o galuega faatino ma matati’a na ausia le faatinoga e aofia ai: 

– Le maua e alalafaga o faamanuiaga tauala mai poloketi ma atinae a le Malo. 

– Le siitia o atinae o maumaga ona o la outou taulamua i asiasiga. 

– O le toe faaleleia o Fale Komiti a alalafaga. 

– O le faamamā ma le faamatagofie o vai taele. 

– O le faaauauina o fuagapepe i nuu ma faamautinoa le soifua maloloina o fanau o alalafaga. 

– O le resitalaina o pepe fananau i tua i nuu aemaise o tagatanuu e maliliu i tua. 

– O le tuuina sa’o atu lea o lipoti i Komiti ma le Saofaiga a Alii ma Faipule.

– O le tele o poloketi e manaomia lo outou faamaonia (Saini) ona o le talitonuga, a faaletonu outou, e aapa atu iai le Malo e tusa o le Tulafono o loo faavae ai nei tofiga.

– E lē gata i lea, ae o loo faamauina foi le tele o talosaga mai nisi o afioaga i ni tofiga fou (SN/SM/STN) ona o le tele o mafuaaga eseese. 

Sa faailoa foi e le Minisita nisi o luitau i le tausaga na tea nei e aofia ai, “le tele o polokalame a Matagaluega o le Malo, e fetuleni uma mai i le taimi e tasi, ae e iai foi lava faagasologa ma galuega a nuu e fia faatino”. 

O feteenaiga i tua i nuu, ma tuuaia ai nisi o sui i le lē sa’o ona faatino o tiute, ae o loo iai foi le taiala a le Matagaluega e faatino ai ana sailiiliga ma iloiloga, e tusa ai ma ni faitioga e tuuina mai.

E tele mataupu faalotoifale ua faaoo mai i le Matagaluega, e aafia ai Sui o Nuu, Sui Tamaitai ma Sui o le Malo.

Fautuaina foi le auai o sui o nuu ma itumalo i soalaupulega i Poloketi poo fuafuaga mo le Atinae o Itumalo, ona o i latou tonu nei e gafataulimaina nuu e aofia ai ma le aoina mai o faamaumauga e patino lava i nuu, ae faapea ai le tāua ona o latou foi le sootaga ma le Saofaiga mamalu a Nuu.

Sa tuuina mai foi e le tamaitai minisita ia Mulipola se faamanatu i Sui o Nuu, Sui Tamaitai ma Sui o le Malo “e taulamua ma faamaite i galuega mo le tumamā lautele ona o loo maitauina le faatalalē o nisi o nuu i le faamatagofie ma le faamamāina o aai”.  

O le tasi o faafitauli ua maitauina o le faataaloa o puaa ma povi, manatu ua aafia ai le matagofie o laufanua ma e manaomia le galulue faatasi o nuu ma afioaga, auā le malupuipuia ma le soifua maloloina o le siosiomaga.  

Sa faailoa foi i lea lipoti itu ua silasila mamao iai le Matagaluega o Tina ma Tamaitai, Atinae o Afioaga ma Agafesootai e aofia ai le iai o se fuafuaga i se taimi o i luma e toe iloilo ai Tulafono o Fono a Nuu ma Mataupu tau Lotoifale faapea Mataupu tau Tina ma Tamaitai. 

O nuu māvae uma ua iai tofiga Sui o Nuu ma Sui Tamaitai o Nuu, ae o tofiga mo pitonuu, e manaomia ona iloilo lelei ina ia iai le maopoopoga o pitonuu ma mafai ona mapo saofaiga a nei pitonuu.

Ae faapea ai ma le gasolo lelei o atinae mo itumalo, e tāua tele le galulue faatasi ma Ofisa o Fono Faavae ina ia mautinoa e tofusia tagata uma o nuu taitasi i faamanuiaga e tauala atu i lenei atinae. 

Sa faamanino foi le moomia o le lagolagosua a nuu taitasi i le fonotaga o le a talimalo ai Samoa. 

“E manaomia e le Malo la outou lagolagosua i tapenaga mo le Fonotele o Malo o le Taupulega o loo fuafua e faatino i le tausaga lenei. E lē gata i le faamamāina o le siosiomaga ae o le isi itu pito sili ona tāua o le tausiga o le filemu ma le puipuiga o tagata uma faapea le saogalemu i tua i nuu ma alalafaga”. 

Aemaise tulaga o soligatulafono o loo tulai mai.

Saunoa Mulipola, “E tatalo atu foi mo la outou lagolagosua i le faailoa o ni gaioiga faasolitulafono o laau faasāina ma le aisa ona o le ogaoga o aafiaga i le puipuiga lautele o soifua o tagata”.  

Na molimauina le faatumulia o lea fonotaga tāua ma sa auai atu foi le sui o le Matagaluega o Leoleo, Falepuipui ma le Toefuataiga auā le faamalamalamaina o itu o loo moomia ai le fesoasoani a nuu ma afioaga mo le taligamalo i le masina o Oketopa.