Ua tāpā foi e se isi alii faipisinisi le faatoesega a le Pule Faatonu ma ua tuuina atu iai le fitu aso e faatoese mai ai Lematua Gisa Purcell a leai ua uia loa ala o le Tulafono.

O le tusi a le Pule Faatonu na tuuina atu i le Alii Minisita ia Toelupe Poumulinuku Onesemo o loo ta’ua ai Oloipola Terrance Betham mai se kamupani e maua mai le eletise i le malosiaga o le la, o loo maua na faia foi ni feutagaiga ma fefaataua’iga ma le Malosiaga Faaeletise le EPC.

I le tusi a Lematua o loo faapea o lea tamalii faipisinisi sa iai foi i le Fono Faatonu a le EPC o se taitaifono, peitai o ia le isi sui o le tasi solar kamupani na faia maliega o fefaataua’iga o le eletise i le atunuu.

I le tali mai o le tusi lea o loo faapea mai ai Oloipola o ia e lei iai i se Fono Faatonu a le EPC, na pau Fono Faatonu sa ia auai ai o le ACC ma le Fono Faatonu a le Polenisia.

O le aso 13 o Tesema i le 2022 na tuuina atu ai e le Pule Faatonu le tusi lenei i le alii minisita.