Ua toe faalēaogāina nei lapataiga ina ia nofo sauniuni mo se sunami sa faamalosia mo le Atu Samoa, talu mai le luluina o se mafuie e tusa lona malosi e 6.4 i le fua o mafui’e i le taeao nei i le tusa o le 8.24am, i le Aso Gafua, 5 Tesema 2022.
O le mafui’e lea na lulu i le tusa o le 184.08 kilomita i le itu i Saute Sisifo o le taulaga o Apia i le loloto e tusa ma le 10 kilomita.
I nisi o molimau a le mamalu o le atunuu o loo tusitusia i luga o le fb i lenei taeao, na ta’ua ai le matuā lagonaina o le lulu o le mafui’e lenei i totonu o fale tetele o le Malo i le taulaga.
O le taimi tonu foi lea ua amata ona agai fanau i aoga ma tagata i fale faigaluega, ae faafuasei ai ona lagonaina le lulu malosi o le mafui’e. Na tuuina mai ai foi fautuaga a le Matagaluega o Leoleo i pisinisi uma ina ia tapunia mo le aso ae faapea foi aoga uma ina ia taofia e oo i suega na fuafuaina mo le asō ua tolopo seia toe logoina atu e le Matagaluega o Aoga Taaloga ma Aganuu.
Atonu i se taimi mulimuli ane pe toe iai nisi lipoti o lenei mafui’e pe afai o iai nisi itu o le Pasefika o afaina ai, ae mo Samoa lava ia, o lea ua toe faamautinoa mai le faalēaogāina o lapataiga na muai tuuina mai, ma ua le o toe iai nei se tulaga lamatia i le saogalemu o le atunuu atoa.
