Ua maua i Niu Sila le vairusi fou o le Omicron ua ta’ua o le XBB.1.5 poo le Kraken.
O le faamaoniga lea mai le soifua maloloina ma e toalua i laua na maua i suesuega ua ta’ua o genome sequencing a le Insitute of Environmental Science and Research i le vaiaso talu ai.
O le vairusi lenei ua faamatalaina e le World Health Organisation poo le WHO o le vairusi aupito i saoasaoa tele lona pepesi e ui e le o mafai ona faamautinoa i le taimi nei pe ono tigaina ai le tagata pe a maua ai.
O le sau o le tala ua maua i Niu Sila e le o faateia ai le matagaluega pe a fua i ripoti e lei mamao atu lea na ripotia mai ai ua maua i Ausetalia.
O le vairusi lava foi lenei e tasi o loo maua ai le toatele o tagata Amerika lea ua toe alu ane ai i luga cases faamaonia.
Mai le soifua maloloina e le o iloa i le taimi nei poo le a le ituaiga malosi o le XBB.1.5 ma le tele o le aafiaga o le komiuniti ae poo le a foi le eseesega mai isi vairusi.
