Ua moomia ona faatupe e le Pharmac tau o masini e fua ai le maualuga o le suka o i latou o loo aafia i lenei gasegase.
O le finau mai lea a le Diabetes New Zealand i le mae’a faalauiloa o le tekonolosi fou lea e okomeki ona siaki ma iloa ai le maualuga poo le maualalo foi o le suka o le tagata ma’i suka.
O le masini fou lenei o le continuous glucose monitor o loo faatupeina e malo e iai Ausetalia ma Peretania, peitai e le o maua lea faamanuiaga i le taimi nei i Niu Sila.
Ua fai mai ai le Diabetes New Zealand ua tatau i le Pharmac ona tuu nei loa le faatuai ae faatupe masini fou nei ona e le gata e fesoasoani i tagata ma’i suka ae faapea ai foi ma le toatele o loo ave i falemai.
Ae mai le Pharmac e pei ona ripotia e le Newshub, e le o vailaau uma e mafai ona faatupe e le Pharmac, ma e fua lava foi i le paketi.
O le tausaga talu ai na faaopoopo ai tupe o le paketi a le malo mo le Pharmac lea e $191 miliona, ma o se faaopoopoga tele lea ua maua e le Pharmac.
I le taimi nei o loo totogi e aiga e moomia ma o loo gafatia le tau o le continuous glucose monitoring system le $50 i le vaiaso ma e le o se tupe laititi pe a fua i tupe faaalu i le tausaga.
