Ua alia’e i lipoti a le 9News i le aso ananafi o loo iloilo nei e le Roosters tulaga e faatatau i le alii taalo o Joseph Su’aallii ma lona agai ese ma le kalapu a o lei mae’a lana konekarate.
O Su’aallii e 19 tausaga o lona soifua, ua saini nei e auai atu i le Rugby Australia i le faaiuga o le 2024 i se maliega e oo atu i le $1.6 miliona i le season peitai o loo iai pea lana konekarate lea i le Roosters seia oo i le faaiuga o le taamilosaga i le tausaga fou.
Sa agiga lava i le lautele finagalo o le kalapu e taofi pea i le alii taalo seia mae’a lelei lona taimi, peitai i lipoti mai le Nine News i le aso ananafi ua ta’ua ai o le faaletonu o nisi o tulaga mai le ‘au i nai vaiaso ua tuanai atu ua iloilo ai e le kalapu le ono faamuta o le konekarate a Su’aalii a o lei mae’a le taimi faatulagaina.
O tusitusiga i le lipoti ua ta’ua ai e Danny Weidler o le Nine, o le faia o le faaiuga lea o le a faasaoina mai ai se vaegatupe 700 afe a le Roosters mo le tausaga fou.
Ua mae’a faailoa foi e le pule o le Rugby Australia Hamish McLennan i le 9News, o lea lava e mafai ona latou gafatia Su’aalii i le tausaga fou pe afai e avanoa.
Na faailoa finagalo o isi tama taaalo o le Roosters i le lipoti lea e faapea e lē tuuaia na o Su’aalii i le lē lelei o le ‘au i le taamilosaga o loo faagasolo, e oo lava foi ia latou, e le o iloga lava ona lelei le taaalo i le taamilosaga.
O le Panthers lea o le a fetaui ma le Roosters i le vaiaso nei a o tālia ai se faaiuga a le kalapu e faia i le mataupu lea.
