Ua faailoa e le Ofisa Sili o Pulega o le Matagaluega o Aoga, Afioga Aeau Chris Hazelman le iai o se suiga itiiti i le faaiuga o taumafaiga a fanau mai aoga i le tulagalua e pei ona vaaia ia latou suega o le tausaga ua mavae

Na ia ta’ua e lē o se suiga tele peitai o le tulaga sili ona tāua o lea ua vaaia suiga.

Ua mautinoa foi o loo tumau lava le tulaga faaletonu o le mataupu o le Matematika, aemaise le taumafaiga o le tusitusi ma le faitautusi.

E silia i le 4000 fanau a Samoa mai le Tausaga 8 na sue i le suega a le malo, e 7 mataupu na sueina ma e toatele na latou ausia le vaega o togi poo le Level 2 lea e amata mai le 40 % togi agai atu i le 45%, o loo iai foi nisi fanau na o latou ausia le Level 3.

Na faailoa foi e le Ofisa Sili o le isi faaletonu o loo iai i le vasega lea o le tusitusi ona e lei oo le tusitusi a le tamaitiiti i le tulaga sa tatau ona iai le Tausaga 8.

O le tausaga 10 i kolisi lea o loo vaaia ai le toatele o fanau na ausia togi i lalo ifo o le 50%, na faailoa e Aeau o le tausaga lea e tatau ona faia ai faaiuga a tamaiti aoga i mataupu e manatu na te tauaveina i luga i le Tausaga 12 ma le 13 peitai e iloa i le faaiuga e lē o iai se tulaga faapea.

Ua vaaia le lelei o faaiuga o suega a fanau aoga i le Vasega 12 i Kolisi i tua ma Salafai, e silia i le 2000 tamaiti na sue ma na ta’ua e toatele ausia togi 200 agai i luga i le tuufaatasiga o le mataupu o le Gagana Peretania ma mataupu lelei e tolu.

Ae o le Vasega 13 lea o loo vaaia ai le tusa ma le 91% o le fanau aoga ua maua avanoa e mafai ai ona ulufale i le vasega faavae o le Iunivesite Aoao o Samoa i Vaivase poo le tauaveina foi o mataupu o le TVET i le Iunivesite lava o Samoa.

O nisi luitau o loo faaalia o le utiuti o faiaoga, o le tulaga i le faitautusi na faailoa ai e Aeau o le mātele lava o fanau e faaaogā Digital Devices o le atili ai lea ona lē lelei le tusitusi ona ua mātele faaaogā le Gagana e lafo ai feau tusitusia ae aunoa ma le tusi lelei ma sipela upu.

O le faaletonu foi o fanau i le Yr 10 e lē o se tulaga na faatoa tupu i le tausaga ua mavae ae o fanau nei na amata mai le tulagalua i le 2014 sa faaletonu mai ai lava i lea taimi le tusitusi ma le faitautusi lea foi ua oo mai luga o loo mafatia ai pea i lea tulaga.

Ae ua aveesea a le Ofisa o aoga common items poo fesili e 10 i totonu o soo se suega o ia fesili e lē o ni mea sa aoaoina e le fanau peitai o le tulaga lava sa sau a’i, o ia fesili na tagai iai le ofisa o aoga i faitioga mai faiaoga ona e manatu ua tosoina e ia fesili i lalo togi sa tatau ona ausia ma avea ma tulaga ua faaletonu ai faaiuga o suega a le fanau.