E iai le auala i Hastings, na faafesoota’i ai e le tagata Samoa e faigaluega i le Council i Hastings ia le aiga o Tuivaiti e ave le igoa o le toeaina o Tuivaiti e faaigoa ai se auala.
O le saunoaga lea a le tina mālōlō ia Roseta Iupeli i luga o le polokalame a le Malu o le Taeao a le Radio Samoa, na ia faamatala ai le faate’ia o si o latou aiga i lenei faaeaea ua faia e le pulega o le latou pitonuu i si o latou tamā matua e ui ina ua tuua le malo e i laua uma ma le tina, le faletua ia Caroline.
Na saunoa Roseta, e fā auala fou i totonu o Hastings sa fia faaigoa i igoa o tagata, o tagata nei o i latou ua lauiloa ma ua iloga a latou tautua i totonu o le komiuniti i Hastings, ma o le ala lena e taumafai ai e faaigoa se auala i se igoa o lea tagata.
O le ave o le igoa i totonu e faaigoa ai se auala, na ia ta’ua e lē puupuu se taimi e fai ai se iloiloga ma sailiiliga a le Council i le soifua tautua a lea tagata i totonu o le komiuniti.
E ave e le Councillor le igoa o le tagata e fai ai latou sailiiliga pe moni sa tautua ma le faamaoni lea tagata, ae o ā foi ni ana galuega lelei sa fai mo lea pitonuu.
O le pitonuu o Flaxmere i totonu o Hastings sa aumau ai le tamā ia Tuivaiti ma lona faletua ia Caroline.
O lea aiga sa nonofo muamua i Aukilani i le 30 tausaga ae sa mālōlō penisione atu i le tausaga 1989 ma nonofo loa i Hastings.
O le toeaina e fiafia tele i le taaloga o le kirikiti palagi ma le kirikiti Samoa, faapea le taaloga o le voli, na ia faamaopoopoina ni taaloga e fai i totonu o Hastings ma ia faavaeina ai loa soo a aulotu eseese i le tausaga 1990.
Sa tele ina fesoasoani i tagata o le komiuniti i le faiga o laisene avetaavale, o le faatinoina o pepa nofomau o tagata ae faapea foi i le uuna’ia o tagata e o e fai a latou palota pe a oo i le taimi e fai ai le faigapalota.
E fā auala i totonu o Hastings o loo faaigoaina i igoa o tagata e pei ona iai le tagata Maoli, o le tagata mai Holani, o le tagata mai Egelani faapea le sui o le Pasfikia lea e iai le toeaina lea o Tuivaiti Feiloaimauso Tuivaiti mai le afio’aga o Falelatai.
O le saunoaga lea a le tina mālōlō ia Roseta Iupeli i luga o le polokalame a le Malu o le Taeao, na ia ta’ua ai e faapea e iai foi le isi auala i totonu o Ueligitone o loo faaigoa i le igoa o le susuga i le faafeagaiga ia Pelema.
