O le 48 tausaga o le soifua o le afioga Tuisugaletaua Sofara Aveau na avea ai ma sui usufono o le Palemene mo le itumalo faaalalafaga o le Vaimauga i Sisifo lea ua suia nei o se itumalo faapalota ma ta’ua nei o Vaimauga Numera Tasi.

O le Aso Lulu na tea nei na tuumalo ai o ia i le 71 tausaga tausaga o lona soifua ma o loo tapena ona toe sauniga.

O se tasi lea o poututoa o le atinae o faatoaga i lo tatou atunuu a o galue ma auauna i le Matagaluega o Faatoaga ma Faigafaiva i tausaga a o lei ulufale i upufai o Malo.

Ina ua filifilia e avea ma Minisita o faatoaga ma faigafaiva faapea vaomatua ina ua filifilia i le tofi faipule i le mae’a o le palota tele o le tausaga e 2001, o ia o se tasi sa tu malosi e saili ni auala e toe faafoi ai le talo a Samoa i le tulaga maua pea, e mafua ina ua matuā olopalaina lea laau tau faatoaga i le faama’i lega.

O ia taumafaiga na taunuu manuia ma amata ai ona toe maua le talo i ona ituaiga eseese e pei ona iai nei.

O loo matamata tetele foi lona sao i le atinae o le atunuu a o avea ma Minisita o Galuega Tetele lea sa taitaifono ai i le komiti a le Malo sa tapenaina le suiga o le itu auala mo taavale i Samoa ma faaaogā ai taavale foeuli taumatau.

O se fuafuaga e lei faigofie ona talia e le toatele ona o atugaluga ma popolega i le saogalemu o le soifua o tagata pe a taunuu lea fuafuaga.

Peitai talu ona amata faamamalu lea suiga ua 15 nei tausaga, e leai se faalavelave tau taavale na aafia ai se soifua e fesootai i le suiga o le itu auala, e pei ona sa finauina i se talosaga tau faamasinoga sa finauina ai le taofi o lea suiga.

E 3 paeaiga tai lima tausaga sa seei ai le afioga Tuisuletaua Sofara Aveau i le tofi Faipule o le Palemene, o le paeaiga o le 2001 i le 2006, 2006 i le 2011 ma le 2011 i le 2016.

O ia o se sui faipule sa lagolagoina le vaega faauipufai e puipuia aiātatau a tagata le HRPP.

O lona soifuaga tautua i le Malo ma le atunuu e lē gata i galuega sa auauna ai, ae o le tofi Faipule o le a manatua pea foi e le toatele i lona tomai i le taleni o le fatu pese ma le lagiina o pese i lona siufofoga malie, a o ia faagaioi le aufaipese a le Maatulua mai Fagalii.

O le a manatua pea lea tamafanau a Samoa o se tamalii sa tele lona sao i le ola ma le soifua atinae o tagata o le tatou atunuu aemaise o le Malo.