Ua faamaonia mai le tala faanoanoa, i le tuumalo ai o le sui faipule o le itumalo faapalota o le Vaimauga Nu.3, le afioga ia Tapunuu Papalii Unasa Niko Lee Hang.
O le Aso Lua, 29 Novema 2022 lea na tuumalo ai le alii faipule i le maota gasegase i Motootua e tusa ai ma lipoti mai Samoa.
E tuumalo nei Tapunuu o loo ia tauaveina le tofi faipule o le itumalo faapalota o le Vaimauga Nu.3 ma o se sui faipule mo le vaega faaupufai a le HRPP.
Na avea le afioga Tapunuu ma minisita i nisi o paeaiga talu ai a o tulai mai le vaega faaupufai a le HRPP i le malo; ae i le paeaiga na faatoa mavae atu sa avea ai Tapunuu ma minisita o Galuega, Fela’ua’iga ma Galuega Tetele a le malo.
E momoli ai faamaisega ma moomooga alofa mo le faletua ma le fanau aemaise le aiga faanoanoa o le afioga i le alii faipule.
