O le tuumalo o le faatonu aoao i Samoa o le polokalame fesoasoani o le ADRA a le Ekalesia Asofitu o le toe Afio mai, le faletua Susuga Su’a Julia Wallwork, o le fā’ia lea o se tasi o poutu sa lotolotoi i le tuuina atu o fesoasoani i aiga ma tagata lima vaivai o le atunuu e ala i lea fesoasoani.
O le ADRA sa faamoemoeina e le malo i le tuuina atu o le fesoasoani o le fausia o fale mo aiga sili ona vaivai lo latou tamaoaiga, ma o le Susuga Su’a Julia Wallwork, sa ave iai le faatuatuaga e faasavali ai lea polokalame ua tele aiga ua faamanuaiaina ai.
O le tausaga e 2010 na avea ai lea tinā o le atunuu ma faatonu o le polokalame, ma o lona taimi a o galue ai i le pookalame a o le’i valaau iai lona matai, sa tele nisi o fesoasoani sa auala mai malo i fafo e pei o Niu Sila sa tuuina atu iai mo le faatinoina.
O le Aso Lulu o le vaiaso nei e amata ai ona toe sauniga i le sauniga faaleaiga, ae Aso Tofi o ona sauniga faai’u ma lagomau ai.
O Su’a Julia o le faletua o le Susuga Seiuli Paul Wallwork ua tuumalo, sa taulamua lea tamalii i le atina’e o le a’oa’oina o fanau a le atunuu aemaise o taaloga i Samoa.
