O le aso ananafi lea na tuuina ai tusi taualoa a le Amepasa o Chile i Samoa, Susuga Hugo Ignacui Llanos i le Ao Mamalu o le Malo Tutoatasi o Samoa, Afioga Tuimalealiifano Vaaleto’a Sualauvi II i le maota o le Ao o le Malo i Vailele.
Mai pepa o faamatalaga, O le Amepasa o Chile o le a galue ma aumau i le nofoaga o faamautu ai i Ueligitone i Niu Sila.
Na ta’ua e Llanos i lana saunoaga e faamautu ai le galulue soosootau’au ai o le Samoa ma Chile i nisi o mataupu tau Malo Aufaatasi e aofia ai mataupu faatemokalasi, o tulafono faavaomalo o le nofo filemu ma puipuiga, faalauiloaina o aiātatau a tagata soifua ma atina’e faaauau a malo e lua.
O Chile o se sui fou o le Dialogue Partner a le Fonotaga a Sui o le Pasefika lea e faasoa ai i nisi o mataupu o loo ave ai le faamuamua a le Pasefika e pei o suiga o le tau ma ogasami ma o le a fesoasoani foi i atunuu o le Pasefika e faafoia nei faafitauli.
Ua tele auaunaga faalemalo sa auauna ai lenei tamalii e ala i le avea ai ma Amepasa o le Malo o Chile i Islamic Republic of Iran mai le 2018 seia oo i le 2020.
Na avea foi ma sui o le Malo o Chile i le Security Council a Malo Aufaatasi.
Sa filifilia foi e avea lava ma sui o le Malo o Chile i le faalapotopotoga a le Maligi faavaomalo ma nisi o tofiga a le Malo o Chile i totonu o Peretania.
O Llanos o loo ia umia se faailoga Fomai Faafilosofia poo le PhD i le mataupu faavaomalo mai le Iunivesite i Geneva ma le faailoga i vaega tau tulafono ma le Iunivesite o Pontifical Catholic i Chile.
O le tausaga e 1978 lea na amatalia ai le faiga faapaaga a le Malo o Samoa ma Chile.
