O le afiafi ananafi sa faataunuuina ai le tufatufaina o faailoga aloaia e le Matagaluega o Aoga Taaloga ma Aganuu mo fanau aoga sa tausinio i taaloga a Aoga ma taaloga Faavaomalo.
I le saunoaga a le Minisita o Aoga, Afioga Seuula Ioane Tua’au ua tolu ai nei tausaga o faatino e le Matagaluega lenei faamoemoe.
“O le faamoemoe maualuga o le matagaluega, ia faatino se sauniga e silafia ai e outou le fanau, le amanaia e le Matagaluēga ma le Malo o a outou taumafaiga, e ala i Taaloga.
“O sauniga faapenei, o le a faaosofia ai lagona o fanau aoga, e tausinio ma le naunautai, ina ia ausia se isi maualuga e sili atu.
“O le amataga o le vaiaso nei, na toe taliu mai ai ma le manuia le Autaalo a Samoa sa tausinio i Taaloga a le Pasefika, ma e toa sefuluiva(19) tamaiti aoga na tauva ai, o nisi o i latou o le a faamanuiaina i taui i lenei afiafi. O le ivasefululima pasene(95%) o le autaalo e 332.”
Na amata mai i taamilosaga ma taaloga a Aoga ma na faailoa e le Minisita o se tulaga maoae ua ausia e fanau aoga o nei avanoa pe a fua i tausaga ua tuanai.
“O nisi o i latou na faamanuiaina foi i nisi o pine mai lea faamoemoe, auā o Samoa na tulaga Fa(4) i le 34 Pine Auro, 21 Siliva, ma le 21 Apamemea.
“Fanau o le a faamanuiaina i lenei afiafi i taui ma faailoga faapitoa, e lē o le taunuuga lea o lou soifua taalo ma le ola taumafai, ae ua na o se laasaga o lou olaga taalo o le a faamuta mai i Kolisi, ae ulufale atu e tausinio i Kalapu.”
O nei tulaga ua ausia e lē māmā i le silasila a le Matagaluega i le atinaeina ai o taaloga i Aoga.
“O lea e tatalo atu ai foi ia tatou Faalapotopotoga o Taaloga Eseese, ia tatou galulue faatasi e saunia a’oa’oga ma polokalame atinae, ma saili atu foi i fafo mo nisi avanoa e faalautele ai tomai.
“Outou le fanau, ia faaauau le taumafai, ia le gata i lenei afiafi, ae ia fai ma avefu’a a Samoa i Taaloga Faavaomalo ma ia maua ai ni lumanai manuia o Nuu ma Afioaga, Aiga ma Ekalesia.
“Faafetai foi i nai Puleaoga ma Faiaoga ma la latou tautua, auā tasi lea o a latou avega faaaopoopo i le tuua ai o aoga i aso taitasi.
“Na o se fautuaga i le tatou Pulega o Taaloga, se’i silasila ane i nai Faiaoga i le taimi e masii ai a tatou autaaalo, ina ia maua ni nai avanoa mo latou e tauia ai lo latou tautiga.
“Faafetai atu foi i nai mātua ma aiga, o ē o loo lagolagoina taumafaiga a nai fanau.
“Malo le lotonuu, faafetai le alolofa i nai fanau.”
Na faafetaia ai foi le lagolagosua a nisi o kamupani ma pisinisi aemaise o faalapotopotoga a le Malo e tusa ai o lenei faamoemoe sa galulue faatasi ai ma le Matagaluega.
