O le Aoga a le Loto Taumafai ma le Fiamalamalama o aoga ia na asia e le Tausala o Faafafine o Samoa, Leon Soonalole o se vaega o polokalame o lana auaunaga a o umia ai le pale o lenei foi tauvaga i le atunuu.
O loo faailoa i faamatalaga mai le Asosi o Faafafine i Samoa o le asia ai o nei aoga ona o le galuega tāua e ala i le aotauina o alo ma fanau i le atunuu e iai aafiaga tumau o le soifua.
Na saunoa Soonalole i le tāua o le ola aoaoina ma le malamalama e tafiesea ai pa puipui ae fausia ma lagolagoina se siosiomaga mo i latou e iai aafiaga tumau o le soifua.
“O fanau uma lava e tatau ona maua avanoa tutusa e aoaoina ai lona ola tuputupu a’e ma ia alofagia e soo se sosaiete.
“O se tiute ma o se matafaioi e fai faatasi ina ia lagolagoina ma unaia pea lo latou taumafai e foia faafitauli o feagai ma latou.”
O se vaega o lana asiasiga na foai ai se fesoasoani o meataumafa auā le fofoga taumafa o alo ma fanau a o iai i aoaoga.
O Soonalole o se tasi filifilia o le autenisi a Samoa lea o loo sauni atu mo taaloga o le Pasefika i Solomona ma o se auala lea o manuia mo ia ma ana taumafaiga e ala i lana galuega fesoasoani.
“Ou te manaomia nei faamanuiaga ma e lē masalosalo foi lo’u loto i le faamanuia mai o alo ma fanau aemaise le vasega o faiaoga ma Pule Aoga a o tapena atu ai i taaloga.
“Faafetai tele lava, i Pule aoga, vasega o faiaoga, aemaise fanau i le taliaina foi o le savali a lenei tagata faatauvaa.”
