O fonotaga faaauau a le Palemene i lenei vaiaso pe a toe usuia i le Aso Lua le aso 24 o Ianuari, o le a faaauau ai ona talanoaina le tala faaopoopo muamua o le tupe, ma tali ai le Malo i mataupu sa laga i finagalo o sui usufono.
Ua faamoemoe a mae’a ona tuuina atu lea e le taitaifono o le komisi a le fono aoao faitulafono, o teuteuga o Tulafono tumau a le Palemene e faasino i aiaiga mo sui faipule e faamalolo le tumau mai o latou tiute faasui usufono ona o ni faaiuga e faia e le komiti o tulaga mamalu ma amio taualoa a le Palemene.
E iai le talitonuga o le toe faia o ni teuteuga i Tulafono tumau o loo faatonutonu ai taualumaga fai a le fono aoao faitulafono faapea amio a sui faipule e faamalolo le tumau, o le a saga tapu’e atili ai le tausia o le mamalu o le Palemene o Samoa.
E pei ona silafia e toalua sui faipule o loo faamalolo le tumau nei mo le umi e lua tausaga, o le faipule o le itumalo faapalota o Lepa le susuga Tuilaepa L Sailele Malielegaoi, ma le faipule o le itumalo faapalota o Faleata 3 le tofa Lealailepule Rimoni Aiafi.
O lea faasalaga na faia e le komiti o tulaga mamalu ma amio taualoa a le Fono Aoao Faitulafono, ina ua faamaonia moliaga o le faalemigao i le Palemene o ia sui faipule poo le contempt of Parliament.
