I le Aso Faraile na tea nei na tuuina atu ai le faamavaega tusitusia a le faipule o le itumalo faapalota o Vaa o Fonoti, le tofa Mau’u Siaosi Puepuemai, i le taitai ma le sui taitai o le vaega faaupufai e puipuia aiātatau a tagata, ma faailoa iai lona solomuli ese mai le toe avea ma sui faipule o le faafaletui.
E lei faailoaina lautele se finagalo o le susuga Tuilaepa L Sailele Malielegaoi, pe ua talia le faamavaega.
Ua toatolu ai nei i le sui usufono o Vaa o Fonoti sui faipule o lea pati faaupufai ua faamavae i le savalia ai nei o le tausaga ma masina e fitu talu ona mae’a le palota tele ia Aperila o le tausaga na tea nei sa filifilia mai ai sui usufono o itumalo palota ma sui faaopoopo o nofoa o tamaitai mo le Paeaiga lona 17 a le Palemene.
E lei manuia sailiga mo se finagalo o le tofa Mau’u Siaosi e pei o isi faipule e toalua le tofa Ale Vena Ale ma le tofa Tuu’u Anasii Leota sa feiloai ma tusitala.
Ae o le faamavaega tusitusia a le sui faipule o Vaa o Fonoti, o loo ia faafetai ai i le taitai o le vaega e puipuia aiātatau a tagata i tausaga e tele o lana taitaiga o le pati faapea le taimi o avea ma Palemia.
Faaalia e Mau’u e tele ni lesona tāua ma aoga ua ia maua mai ai. E leai foi se mea o gase pe faaletonu i le latou mafutaga i totonu o le latou vaega faaupufai.
Peitai ua faailoa e le sui faipule i lana tusi faamavae ua tuu fesili atu pea le paia o tupu ma e’e o le itumalo ma le au faigaluega totofi a le Atua, poo fea ni galuega ua faatino talu ona mae’a lana saunoaga faataupou i le Maota fono o le atunuu.
O lana silasila o lona tiute lea e tatau ona faatino o le tautuaina o lona itumalo mo galuega e manuia ai tagata o Fagaloa. O le mafuaga lea ua ia talia ai le tuualalo e faasee tuagalu ma le pati faaupufai sa tauva ai i le palota tele, ae avea ma faipule tutoatasi e avanoa ai lana lagolago i fuafuaga a le faigamalo ua tu nei i le foe auā se manuia au i luma o lona itumalo, aemaise o lana nofoaiga muamua lenei i le tofi faipule o le Vaa o Fonoti.
O se vaega o lana tusi faamavae e faasino tonu i lea tulaga e faitauina faapenei, “Atonu o le a ou le auiliilina atu le tele o manaoga e fia faaleleia mo lo’u itumalo, ma ua ou manatu ai, afai lava ou te nofonofo ai lava i le tatou vaega faaupufai, o le upu moni, e mae’a le paeaiga lenei e leai, leai, leai lava se manaoga o si o’u itumalo e faataunuuina ona o tulaga faapolokiki aemaise o ‘ai o Vaega faaupufai”.
“O le ala lea o le fesiligia pea o a’u e lo’u itumalo i ona tupu ma ona e’e ma le loaloa o lo’u itumalo o loo alala ma papaaao i Fagaloa i le taimi lenei, Mau’u o lea ua lua tausaga o lau lauga faataupou i le Palemene ae leai ma se mea ua faatinoina”.
“O se tuualalo foi lea faifai pea a le aiga Sa Levi ma le Pulega a Fagaloa ona o fita o loo feagai ai pea ma lo’u itumalo i aso uma, i le leaga o auala tetele, ae o le afaina ma le lamatia o le saogalemu i taligalu ma le gataifale”.
“Ma ua latou fesiligia ai a’u pe le ua alagagatau loa ona ou faasee ese ma le vaega faaupufai, i se auala e ono liliu mai ai le faigamalo e faatino galuega mo le itumalo ae ua noatia ona o tulaga faapolokiki ma vaega faaupufai”.
O le tauaofiaga a le Palemene i le aso 20 o le masina fou o Tesema o le a folasia ai e le Fofoga Fetalai se faaiuga i faamavaega a isi faipule e toalua o le vaega e puipuia aiātatau a tagata, ma o loo iai le talitonuga o se faaiuga o le a aofia ai ma le faamavaega a le faipule o Vaa o Fonoti.
