E toafitu ni alii pagota o loo molimau e lagolago le moliaga a leoleo o le faaoo manua, o loo tuuaia ai se isi alii matua sa tuli sona faasalaga i le falepuipui i Tanumalala.
O Sio Galu Agafili ua faaalia e leoleo i le latou moliaga sa ia umia se tolopa na ia taina ai se alii pagota talavou 27 tausaga le matua ma aafia ai i ni manua i lona ulu ma lona itu.
O le solaaga tele a pagota ia Mati o le tausaga e 2020 na tupu ai lea gaioiga solitulafono, a o taumafai leoleo o le falepuipui e taofi le sosola o se vaega o pagota na mafai ona matala i tua ma potu sa nonofo ai.
O le pagota o Misi Panapa sa alu ese ma le potu tasi sa loka ai, ona momo’e ane lea i le vaega o loo iai le potu ono ma lona faamoemoe e pe’a i luga o le pa ma sao ai i fafo o le lotoa o le falepuipui i Tanumalala.
Peitai o le pagota o Sio Galu Agafili ma isi o le aunofosala sa fesoasoani i leoleo o le falepuipui e taofi le solaaga a pagota, a o tupu lea tulaga e pei ona faaalia i taualumaga o le suesueina o molimau a leoleo, sa vaaia e Sio ua pe’a i luga o le pa o le falepuipui le alii o Misi.
Sa faalatalata atu loa iai Sio ma ta i le tolopa ma pa’ū ai i lalo, ma faaoolima loa iai isi pagota e toalua. Faaalia e Misi Panapa e tei ane o loo i le falemai.
O loo faaauau pea le suesueina o molimau, ae o Sio Galu Agafili o se pagota sa tuli lona faasalaga 5 tausaga ae mulimuli ane maua i sailiiliga a le faamasinoga ia Iulai o le tausaga e 2020, ua silia ma le lua tausaga talu ona mae’a tuli lona faasalaga ae o loo nofo pea i le falepuipui.
