Ua tuuaia nisi o faleoloa tetele e tolu i Ausetalia nei i le taufaasese i le au faatau i tulaga o aiātatau i se refund poo le toe suia o se oloa pe toe lipea foi.
O le CHOICE o se auaunaga i Ausetalia e silasila i tulaga faapea ua o latou ta’ua na faatino suesuega e faaaoga ai mystery shoppers i faleoloa e 80 o le Harvey Norman, J Hi Fi ma le The Good Guys i Ausetalia atoa a o lumanai ai le sale tele ua faaigoa o le Black Friday Sale lea faataunuu i le asō.
O lenei la suesuega na faia ua iloa ai le 71 pasene o faleoloa uma nei ua latou tuuina ni faamatalaga taufaasese e faatatau i aiātatau a le tagata faatau pe afai ae lē lelei le oloa ae ua uma foi le piliota o le warranty.
E 91 pasene na taumafai e faatau warranties e le o tele ni o latou puipuiga mo tagata faatau e pei ona faamaonia i lalo o le tulafono, Australian Consumer law.
Fai mai le sui o le CHOICE o latou ua faateia i le iuga o lenei suesuega ma o tulaga o oloa faatau e ao i pisinisi ona fesoasoani i tagata faatau pe a iai se mea e faaletonu i oloa ua o latou faatauina e tusa lava pe ua mae’a le taimi o le warranty sa tuuina iai.
Fai mai sui o le CHOICE e moni e solitulafono le solia e le aufaipisinisi o tulafono ia tau faatauga ae e le o iai ni faasalaga i le tulaga lea mo le solia o lea tulafono ma afai e le faia ni faasalaga mo le faia o le mea sese, o le a le mafai lava ona faamuta lea tulaga.
Fai mai le 9News e lei iai lava se isi o nei pisinisi ua tali ane mo se faamatalaga e tusa ai o le iuga o lenei suesuega.
