O le tina 39 tausaga le matua na molia i le fasioti tagata pa’ivalea, ona o lana gaioiga sa ia togi ai le maa ma lavea ai le ulu o se tasi o lana fanau teine ma maliu mulimuli ane ai, ua manatu le faamasinoga o lagona ootia ma mafatia o le tina i le mea na tupu, ae o se gaioiga foi na ia faia a o mamafa i lona ma’itaga, ae le o se mea na fuafuaina peitai na mafua ona ia faia ona o le ita, ua tuu avanoa ai le faamasinoga ma le faaiuga e le nofosala le tina o Susana Lavea Lala o Toamua ma Safotu, i le falepuipui, ae nofo vaavaaia mo le lua tausaga.
Ua faapafala mo le ono masina se faasalaga o le isi ona moliaga ua faamaonia foi o le umia lea o se aupega matautia, le maa sa aafia ai le ulu o lana tama teine 13 tausaga ua maliu.
O le faasalaga lenei ua lē ‘alo ai lava le faamasinoga i le faamanatu i mātua lo latou tiute tāua o le vaaia ma le tausia lelei o fanau, ma e lē tuua ai lava le tiute o le faamasinoga i le faia o faasalaga talafeagai.
O Novema o le tausaga na tea nei i Toamua na tulai mai ai le faalavelave na aafia ai le teineititi 13 tausaga.
O le tina na molia e toasefulu ona alo ma na tupu le faalavelave ia Novema o le tausaga ua mavae o loo maitaga.
O Mati o le tausaga nei na ola ai lona ma’i.
