A o tālia le aso 20 o le masina fou o Tesema e tauaofia ai le Palemene ma folasia ai e le Fofoga Fetalai le mataupu i le faamavaega a sui faipule o itumalo o Siumu ma Faleata 4 mai le toe avea ma sui lagolago o le vaega e puipuia aiātatau a tagata, ua tusi atu nei le sui taitai o lea vaega faaupufai le tofa Lauofo Fonotoe Pierre Lauofo Meredith i le Fofoga Fetalai, ma fautuaina e faia ni moliaga o ia sui faipule i lalo o le vaega 142 (1) o le Tulafono o Faigapalota o le tausaga 2019.
O loo aiaia i lea vaega o le tulafono le faia e le fofoga fetalai o sana faasilasilaga e faailoa ai le avanoa o se nofoa poo ni nofoa i le faamavae ai o se sui usufono mai se vaega faapati faaupufai ae lagolago i se isi pati.
O lea foi aiaiga o loo mafai ai ona avanoa se nofoa poo ni nofoa pe a le auai i se fono mo le tolu aso se sui usufono e aunoa ma se faanoi poo se mafuaaga tatau.
Ae o le vaega 46 o le Tulafono Faavae o loo faailoa atu foi e Lauofo i le fofoga fetalai e mafai ai ona ave sui faipule i le Faamasinoga e faia ai se faaiuga, e aunoa ma le soalaupuleina e le fono aoao faitulafono ona e leai se aiaiga faaletulafono e avanoa ai sea tulaga.
O loo fesiligia e sui faipule ua faamavae mai le vaega e puipuia aiātatau a tagata le oia o a la aiātatau e filifili ai e avea ma sui tutoatasi ae le lagolago atu i se isi vaega faaupufai.
O le Aso Faraile na tea nei na tuuina atu ai le tusi a le sui taitai o le hrpp ma le itu agai i le fofoga fetalai o le Palemene. O le lua a’i lea o tusi mai lea vaega faaupufai ina ua mae’a ona tuuina atu le tusi a le taitai le susuga Tuilaepa L Sailele Malielegaoi o loo ia fola atu ai i le fofoga o le fono aiaiga o le tulafono o faigapalota ua tatau ai ona faia ni palota laiti a sui o le latou vaega ua momotu le latou mafutaga ma ua le toe avea ma sui lagolago.
O le feiloaiga ma le fofoga fetalai le susuga Papalii Li’o Oloipola Ta’eu Masipa’u i le vaiaso na tea nei, na ia faailoa mai ai, e faatoa iloa le taotoga o le faamavaega pe a tuuina atu i se finagalo o le Palemene le mataupu i le aso 20 o le masina asau nei o Tesema.
