Ua faamaonia mai o se osofa’iga faatupu faalavelave na faatinoina i le kamupani e faagaioia e se setete i le atunuu o Turkey poo Take, e lata i le laumua o Ankara i le aso ananafi.

A itiiti mai pe to’alima ua maliliu ma le 22 o loo manunu’a i le osofa’iga lea i le (TUSA) Turkish Aerospace Industries i lona ofisa autū i lea faaitu o le atunuu ma ua manino mai o le ‘auosofa’i o se alii ma se tamaitai ua maliliu uma.

O le to’alima o nai tagata na fasiotia ai i lea osofa’iga e aofia ai ni tagata faigaluega e to’afā o le ofisa lea ma se avetaxi na aveina atu le ‘aufaatupu faalavelave i lea nofoaga.

O loo maua lelei i nisi o videos ma faailoa foi i luga o le social media le taimi na pā ai le nofoaga lea, le TUSA headquaters, ma vaaia ai se tagata o momo’e ese mai le nofoaga ma se a’upega pei o se fana, na momo’e aga’i i se kāpaka.

O le isi video o loo maua ai ata o le ‘auosofa’i o loo o ane ma tama’i ato faafafa ma fana.

E lei iai se kulupu ua o latou faailoa pe o latou na faatinoa lea osofa’iga peitai ina ua fesiligia e tusitala le minisita o le puipuiga a Take, o Yasar Guler, na ia ta’ua ai e foliga o le kulupu ua faaigoa o le PKK, le Kurdistan Workers Party na faatupuina.

O lea faalapotopotoga o loo lisi e Take, le Iuni a Europa ma Amerika, o se faalapotopotoga faatupu faalavelave.

O nisi lipoti aupito lata mai i le asō ua ta’ua ai le osofa’ia e Take o nisi o nofoaga a le militeli i Iraq ma Syria ma ua faailoa e silia ma le 30 nofoaga ua faaleagaina.

Puna o Faamatalaga: https://edition.cnn.com/2024/10/23/europe/turkey-ankara-aerospace-attack-intl/index.html