O le sao tāua o tinā ma tama’ita’i, i latou ua ta’ua o le auuso fealofani a le Ekalesia Metotisi i Samoa ma atunuu e mamao, o loo faatasia nei i le ulua’i mafutaga ua auai ma tupulaga tama’ita’i talavou o le ekalesia lea na tatala aloa’ia i le afiafi o le Aso Tofi ma tumutumu ai Fogaa i Faleula le laumua o lea ekalesia i lo tatou atunuu.
O le tele o lu’itau o loo feagai ma tama’ita’i ma nisi o tapenaga mo lo latou atina’e manuia o loo talanoaina ma soalaupule i lea ulua’i mafutaga.
O le Pelesetene aoao o le ekalesia sa ta’ita’i i le sauniga lotu na tatala ai lea faatasiga a le auuso tama’ita’i o le Ekalesia Metotisi.
Le Pelesetene aoao o le Ekalesia Metotisi susuga Faulalo Leti i se vaega o le sauniga lotu na tatala ai le mafutaga muamua a le auuso tama’ita’i o le ekalesia.
Na faailoa e le Pelesetene sili o le auuso e le’i faigofie le tapenaina o le mafutaga e silia i le tasi le afe tama’ita’i o le ekalesia e aofia ai ma faletua o faafeagaiga o loo auai.
Le pelesetene sili o le auuso fealofani o le Ekalesia Metotisi, le faletua o Fialelei Leti Paaga.
E fā aso o le mafutaga o loo auai aumalaga o tama’ita’i o le auuso fealofani mai atunuu mamao.
O faasalalauga tuusa’o i upega tafa’ilagi a le auaunaga faasalalau o le Cuatro Media sa faasalalau ai le sauniga na tatala ai lea mafutaga.
